Wrexham កើនចំនូល 155% ក្រោយការវិនិយោគរបស់តារាហូលីវូដ Ryan និង Rob

ក្លិបបាល់ទាត់ Wrexham បានចេញសេចក្តីថ្លែងការពីលទ្ធផលហិរញ្ញវត្ថុ កើនឡើងជាកំណត់ត្រាសម្រាប់ឆ្នាំដំបូងរបស់ពួកគេនៅក្នុងលីគបាល់ទាត់អង់គ្លេស (EFL) ក្រោមការវិនិយោគរបស់តារាហូលីវូដទាំងពីរ Ryan Reynolds និង Rob McElhenney ។ របាយការណ៍ប្រចាំឆ្នាំរបស់ Wrexham ចេញផ្សាយកាលពីពេលថ្មីៗនេះសម្រាប់

រដូវកាល 2023-24 បង្ហាញពីប្រាក់ចំណូល 26.7 លានផោន ដែលជាកំណើន 155% ធៀបនឹងរដូវកាលចាស់។ របាយការណ៍បានបង្ហាញពីកម្រិតនៃការចាប់អារម្មណ៍ជាសាកល របស់ក្លឹបនៅភាគខាងជើងប្រទេសវែលស៍មួយនេះ ជាមួយនឹងការបំបែកភូមិសាស្ត្រនៃចំណូលដែលបានឃើញ 52.1% បានមកពីខាងក្រៅចក្រភពអង់គ្លេស ខណៈនៅអាមេរិកខាងជើង កើនឡើងពី 24.6% ក្នុងឆ្នាំ 2023 ដែលបានមកពីភាពជោគជ័យនៃភាពយន្តឯកសារទូរទស្សន៍ “Welcome to Wrexham”។ បច្ចុប្បន្ន Wrexham កំពុងឈរលេខពីរក្នុងតារាង League One ដែលជាក្របខណ្ឌទីបីរបស់អង់គ្លេស។ តំណែងនេះ Wrexham សង្ឃឹមថានឹងរក្សាបានដើម្បីឡើងទៅកាន់ក្របខ័ណ្ឌ Championship កម្រិតទីពីរ ដែលជាកម្រិតមួយដែលពួកគេបានឈានដល់ចុងក្រោយតាំងពីឆ្នាំ 1982 ហើយក៏នឹងជាបីរដូវកាលជាប់គ្នាដែលពួកគេរំកិលឡើងមួយកម្រិតរាល់ឆ្នាំ។ ក្នុងចំណោមចំណូល 26.7 លានផោនសម្រាប់រដូវកាល 2023-24 ប្រាក់ចំណូលពាណិជ្ជកម្មបានកើនឡើងដល់ជិត 13.2 លាន ដែលជាការកើនឡើងដ៏ធំនៅលើ 1.9 លានកាលពីឆ្នាំមុន ស្របពេលប្រាក់ចំណូលក្នុងថ្ងៃប្រកួតគឺប្រហែល 5 លានផោនកើនឡើងពី 3.1 ក្នុងឆ្នាំ 2023 ។ ក្រុមនារីរបស់ Wrexham បានឈានដល់វគ្គផ្តាច់ព្រ័ត្រ FAW Cup និងបានឈានទៅវគ្គ Play-Off នៃលីគ ខណៈដែលកីឡាការិនីរបស់ក្លិបបានក្លាយជាពាក់កណ្តាលអាជីពជាលើកដំបូង៕