Zverev និង Fritz បង្ហាញមុខនៅ Miami Open វគ្គ 16 នាក់ចុងក្រោយ

កីឡាករវាយកូនបាល់អាល្លឺម៉ង់ Alexander Zverev បានបន្តដំណើរទៅវគ្គ 16 នាក់ចុងក្រោយនៃការប្រកួតវាយកូនបាល់កម្មវិធី Miami Open នៃក្របខណ្ឌ ATP Masters 1000 នៅសហរដ្ឋអាមេរិក។ កីឡាករវ័យ 27 ឆ្នាំធ្លាប់ជាម្ចាស់មេដាយមាសអូឡាំពិករូបនេះ បានយកឈ្នះកីឡាករអូស្រ្តាលី Jordan Thompson ដោយលទ្ធផល

7-5 និង 6-4។ វគ្គ 16 នាក់ចុងក្រោយ Zverev នឹងត្រូវជួបជាមួយកីឡាករបារាំង Arthur Fils ដែលបានទម្លាក់កីឡាករម្ចាស់ផ្ទះអាមេរិក Frances Tiafoe។ គិតមកដល់ពេលនេះ កីឡាករអាមេរិកដែលនៅសល់នៅ Miami Open គឺ Taylor Fritz តែម្នាក់គត់។ កីឡាករអាមេរិករូបលំដាប់ទៅបីក្នុងកម្មវិធីនេះ បានយកឈ្នះកីឡាករកាណាដា Denis Shapovalov 7-5 និង 7-3។ Taylor Fritz ដែលគេស្គាល់ថាមានជំនាញវាយសេវាខ្លាំងនោះ រកបានពិន្ទុពីការវាយសេវារបស់ខ្លួន 9 លើក និងមានកំហុស Double Fault តែម្តងគត់ក្នុងជ័យជំនះនេះ ដើម្បីយកឈ្នះគូប្រកួតកាណាដាប្រើពេលមួយម៉ោង 21 នាទី។ Taylor Fritz នឹងត្រូវជួបជាមួយកីឡាករអូស្រ្តាលី Adam Watson ដែលបានយកឈ្នះកីឡាករឆាយនីសតៃប៉ិ Coleman Wong Chak Lam។ ចំណែកការប្រកួតផ្នែកនារីវិញ កីឡាការិនីម្ចាស់ផ្ទះអាមេរិក Coco Gauff បានធ្លាក់ពីការប្រកួតហើយក្រោយរងបរាជ័យក្រោមស្នាដៃកីឡាការិនី Magda Linette 6-4 និង 6-4 ត្រឹមវគ្គ 16 នាក់ចុងក្រោយ។ Magda Linette នឹងត្រូវជួបជាមួយកីឡាការិនីអ៊ីតាលី Jasmine Paolini ដែលយកឈ្នះ Naomi Osaka។ រីឯកីឡាការិនីកំពូល Aryna Sabalenka បានយកឈ្នះអ្នកការពារតំណែងជើងឯក Danielle Collins បន្តជួបជាមួយកីឡាការិនីចិន Zheng Qinwen៕